Folga polo Clima: mellorar as prácticas en relación aos residuos para reducir os efectos do cambio climático

Diferentes organizacións de Galicia participarán na folga polo clima que se celebrará hoxe venres 27 de setembro a nivel internacional. Máis de 50 asociacións e colectivos subscribiron o manifesto do Movemento Galego polo Clima para “pedir aos gobernos medidas efectivas fronte á crise climática”.

O manifesto dos grupos ecoloxistas galegos consta de demandas nas que o movemento insta a todas as institucións adeclarar e asumir a emerxencia climática como un grave problema”; “tomar medidas reais e efectivas para a eliminación de emisións de gases de efecto invernadoiro” e “acordar medidas para loitar contra a contaminación do CO2“.

 

A xestión dos residuos e o cambio climático

Desde o CM Barbanza lémbrase a influencia do transporte e o tratamento dos residuos nas emisións de gases de efecto invernadoiro (GEI), e fai un chamamento a aplicar as mellores prácticas para reducir estes efectos.

Segundo afirma o Grupo Intergubernamental de Expertos sobre o Cambio Climático (IPPC), se se quere manter o quecemento global moi por debaixo dos 2°C, a reducción das emisións de gases de efecto invernadoiro de todos os sectores é fundamental, e o sector dos residuos non é unha excepción. A influencia global das actividades de xestión de residuos sobre o balance de emisións de GEI é moi relevante, ao liberar dióxido de carbono (recollida, transporte, incineración) e metano (vertido de residuos biodegradables).

Así, a prevención de residuos é sen dúbida a opción ambientalmente máis eficiente, evitando a xeración de GEI debidos ao tratamento como á producción da materia prima. Algunhas prácticas que fomentan a minimización dos residuos son: evitar a sobre-embalaxe dos productos, mercar productos a granel e de cercanía, prescindir da bolsa de plástico, etc.

A reutilización e a reciclaxe implican tamén grandes aforros de emisións, transformando materiais de refugallo en recursos valiosos. É imprescindible realizar unha correcta separación en orixe desde as vivendas para maximizar a calidade dos materiais e reciclar e minimizar a eliminación de rexeites.

A compostaxe dos residuos biodegradables (restos de comida, poda, etc) separados en orixe nos concellos adheridos ao CM Barbanza permite obter compost para os solos agrícolas e de xardinería, mellorando o crecemento dos cultivos e evitando a súa erosión.

A práctica da compostaxe caseira e comunitaria permitirá ademáis aforrar os GEI asociados ao transporte da metade dos residuos que producimos a diario.

 

Concentracións e manifestacións polo Clima

Este venres 27 de setembro hai convocadas concentracións e manifestacións nas cidades e vilas galegas para reclamar “accións urxentes” que fagan “fronte ao cambio climático” e que “garantan un futuro para as xeracións máis novas”, así como tamén se anima a realizar unha “folga de consumo” durante ese día.